التخطي إلى المحتوى

الحصول على مجموعة نكت رخمة مضحكة جداً ليس أمرًا سهلًا؛ حيث إن هذا النوع من النكت يتوقف على الذوق الخاص بكل شخص من الأشخاص دونًا عن الآخر، لكن بصفة عامة يوجد جمهور خاص يستمتع بسماع نكت رخمة.

نكت رخمة

من المعروف أن النكت هي ما يزيح عن الناس الحزن والهم.. لكن يختلف ذوق الأشخاص في اختيار النكت المفضلة لهم، حيث يوجد بعض الأشخاص الذين يفضلون الاستماع إلى نكت رخمة.. لذا سنقدم لكم أجمل نكت رخمة على الإطلاق من خلال ما يلي:

  • راجل دخل مطعم قالهم مساء الخير.. عندكم عشا؟ قالوله أيوة، قالهم أمال معزمتونيش ليه؟!
  • دخل المدرس الفصل وسأل التلاميذ.. يعني أيه سبيل؟ رد حد من الطلاب قاله يعني طريق، قام قاله برافو طب يعني أيه سلسبيل؟ راح الطالب قاله: أكيد طرطريق يعني سهلة أوي يا مستر.
  • راجل عبيط قدم على وظيفة في شركة.. كان عنده ضرسين بس راحوا عينوه مكان الخرامة.
  • واحد محشش وقع في حفرة وهو ماشي في الشارع.. قام قعد يحاول أنه يطلع 3 مرات، لغاية ما حس أنه تعب راح قال والله لأنا قاعد هنا.
  • ست راحت تشتري شبشب من على الرصيف، كان معاها ابنها الصغير، فقعدت تختار الشبشب وبعدها راحت مطلعاه وضاربه بيه الولد الصغير.. فالولد قعد يعيط قامت قالت للراجل حلو ده أنا هاخده.
  • شخص شاف واحد أعمى قاعد ماسك الجرنال وبيقرأه.. قاله غريبة دي أزاي بتقرأ وأنت أعمى؟ راح الأعمى رد عليه قاله: وأنت مين قالك إني بقرا أنا بشوف الصور بس.
  • واحدة قالت لخطيبها ها يا حبيبي هتجيبلي أيه؟ عيد ميلادي قرب.. راح قالها يااه تعالي، اخدها محل كبير بتاع كمبيوتر وقالها شايفة اللاب توب اللي لونه أحمر في الرف اللي فوق ده؟ قالتله ياه دا حلو أوي.. راح قالها هجيبلك مونوكير نفس اللون.
  • طالب اتطرد من الامتحان بتاعه عشان كان جدول الضرب مكتوب على الآلة الحاسبة بتاعته من ورا وهو كتبه تاني.

أرخم نكت ممكن تسمعها

من الممكن أن تجد نكت رخمة بس مضحكة، حيث يفضل هذا النوع من النكت الكثير من الناس.. وتستطيع أن تحصل على أكبر عدد من هذه النكات بسهولة عبر ما يلي:

  • واحد كان ليه جارة حلوة أوي وبتهتم بنفسها جدا.. فقرر أنه يتجوزها خصوصًا أن جوزها ميت يعني، راح يخبط عليها عشان يقولها، فالست فتحت من غير مكياج.. الراجل اتصدم من منظرها راح قالها أيه أخبار المرحوم؟
  • لو قعدت مع حد وقعد يقولك لازم تبقى متوقع أي حاجة من الدنيا وكلام كله فلسفة كده.. أديله بالقلم على وشه وقوله وأنت بقى كنت متوقع القلم ده؟
  • خليك عارف أن لو في شاب لعب مع ولد صغير في الشارع فأخت الولد ده أكيد واقفة في البلكونة.
  • راجل سايق العربية بتاعته في أمان الله لقى ست بتكسر عليه.. فطلع من العربية يزعقلها ويقولها أنتِ رايحة فين يا ست؟ راحت ردت عليه بكل راحة قالتله رايحة عند حماتي.. الراجل اتصدم ودخل تاني قبل ما يتشل.
  • مرة بنت واقفة بتتكلم مع ولد عند محطة الأتوبيسات وقالتله سؤال راحت عربية معدية عملت صوت عالي فمسمعش أيه السؤال ده.. راح هو رد على أساس أن السؤال كان حلو أوي لبسك جايبه منين، فقالها: يحلي أيامك، قامت قالتله ايه؟ بقولك أيه تخصصك.
  • واحدة ست رايحة تعدي السكة بأبنها.. قامت ماسكة إيده ومعدية جري وهي بتقوله شوفت يا حبيبي الموضوع طلع سهل إزاي؟ لقت حد بيقولها ربنا يخليكي مكنتش هعرف أعدي لوحدي.. لقت نفسها سحبت شاب تاني من على الرصيف بدل ابنها.
  • واحد قعد مع صحابه وفضل يقولهم إن اللغة العربية دي سهلة أوي أوي.. قام حد من اللي قاعدين قاله طب هسألك سؤال وجاوب بلا أو نعم بس …… أنا دجاجة.

نكت مضحكة رخمة قصيرة

الضحك هو أكثر الأشياء التي لن يختلف عليها أحد.. فالجميع يحب الضحك كثيرًا، لذا سنقدم لكم أفضل نكت رخمة مضحكة من خلال ما يلي:

  • في يوم من الأيام واحد مات قامت كل الأرقام الباقية عيطت عليه.
  • واحد محشش راح لصحابه قالهم اسكتوا مش أنا لقيت قملة إمبارح في رأس السنة.
  • ميكانيكي قرر أنه يشتغل مدرس راح أدى الطلاب تروس خصوصية.
  • شخص بيستهبل كتير اتجوز واحدة بتستهبل كتير.. أول ولد ليهم نزل بيمثل عليهم أنه ميت.
  • بنت خارجة وهي متسربعة ومتأخرة أمها لما شافتها اتلغبطت بينها وبين أخوها.
  • راجل دخل ينام ساعة صحي لقى نفسه بقى خاتم.
  • دبانة كانت ماشية بسرعة خبطت في الحيط ووقعت جوا إزازة الويسكي.. قامت طلعت منها عمالة تقول أوعى الصقر.
  • شاب راح يزور حديقة الحيوانات.. أول ما دخل لقى في القفص الأول ذئاب ولقى في القفص الثاني عودة.
  • محشش قعد على القهوة مع صحابه راح قالهم أووف أنا اتلسعت.
  • صعيدي محشش خبط على الجيران قالهم مساء الخير.. عندكم طماطم؟ قالوله أه يا بني عايز حاجة؟ قالهم لا أحنا كمان عندنا.
  • شيطان حب يوسوس لواحد صعيدي قام جاب معاه 4 تانيين.. فقالوله ليه كده؟ قالهم عشان أنا أوسوس له وأنتم تفهموه.
  • واحدة بتشتغل مذيعة دخلت تعمل عملية كبيرة في ضهرها.. قاموا شالوا من عندها فقرة وحطوا برنامج.
  • واحدة اسمها نادرة اتجوزت واحد اسمه نادر.. لما خلفوا سموا ابنهم مهدد بالانقراض.
  • واحد محشش وقف تاكسي قاله فاضي يا عم.. قاله أه قاله طب تعالى نتسلى شوية.
  • اتنين محششين واحد منهم بيقول للتاني الحق الشمس شرقت.. راح صاحبه رد عليه قاله يا عم فيها أيه إديها مايه.

أجمل النكت الرخمة المميزة

إذا كنت تريد الوصول إلى أكبر عدد نكت رخمة على الإطلاق.. فيمكنك أن تجد كل ما تريده بسهولة من خلال متابعة ما سنعرضه أمامك عبر السطور التالية:

  • ميكانيكي حب يغير النشاط وقرر يفتح مصنع شيكولاتة قام سماه مصنع كالاكسي.
  • واحد بيشتغل كمسري راح يخطب بنت.. لقى المهر اللي معاه قليل على اللي أبوها طلبه، قام كتب الجزء الباقي منه على التذكرة من الضهر.
  • واحدة مع جوزها وقاعدين في جو رومانسي أوي.. قالتله بقولك أيه قولي حاجة تخليني أحس بالأمان أنى معاك، راح قالها يا سلام يا حبيبتي بس كده.. قسم البوليس.
  • بنت جابت لحبيبها بغبغان هدية عيد ميلاده.. فلما شافه اتبسط أوي وأخده وكان طاير من الفرحة، تاني يوم بتقوله ها احكيلي عملت أيه مع البغبغان.. قالها عادي زي الفراخ بالظبط نفس الطعم.
  • هل تعلم أن القطة بتفضل تخربش طول الوقت يمكن ربنا يحن عليها وتكسب مرة.
  • واحد صعيدي اتجوز بنت من بلدهم.. فأبوها قاله شوف يا بني لو لقيتها بنت اضرب في الجو طلقتين.. ولو لقيتها مش بنت موتها، أهو نرتاح من العار اللي هتحطنا فيه.. راح أول يوم ضرب طلقتين في الجو، وتاني يوم صحيو على خبر أنه موتها.
  • الحمد لله أن الشرطة مفيهاش بنات.. كان زماننا بنعاني من وجودهم في الشارع مقموصين عشان الحرامي هرب منهم.
  • من عجائب الدنيا أن الناس كلها في أي بلد لما بطنهم بتوجعهم بيبقى السبب يا برد في المعدة يا أكل مش كويس.. إلا المصري دايمًا يشك في الحمل.
  • واحد محشش دخل محل وطلع منه ميت من الضحك.. فقالوله في أيه يا عم مالك؟ قالهم حاسبتهم ومخدتش منهم حاجة.

نكت رخمة جامدة طويلة

من المعروف أن الشباب تفضل استخدام نكت رخمة أثناء المزاح مع بعضهم البعض.. لذا سنعرض لمن يحاولون التعرف على أجمد النكت الرخمة مجموعة كبيرة فيما يلي:

  • شخص صعيدي كان حران أوي وبيته مفيهوش مراوح أو تكييفات أو أي حاجة، راح دور على دواء خافض للحرارة وأخده.
  • واحد محشش قرر أنه أخيرًا هيخطب بنت.. فبعد ما وافقت عليه بصوا لقوه بيقول لا أنا مش هكمل الجوازة دي، سألوه ليه بس يا بني حصل ايه؟ قالهم ما اللي ترضى تتجوزني ترضى تتجوز غيري.
  • مرة حمار راح فرح أسد.. فالأسد جابه في نص الفرح وقاله أنت جاي ليه أنا معزمتش حمير ففرحي، قاله يا عم أهدى أنا كنت أسد زيك قبل الجواز بس منها لله اللي خلتني حمار.
  • شخص غبي راح جاب تاكسي.. كل ما يمشي في حتة واحد يشاورله يقوله تاكسي تاكسي.. يرد يقولهم ما أنا عارف أنه تاكسي.
  • شاب قال لصاحبه تعالى صورني صورة حلوة.. قاله يلا بينا، راح مصوره صورة قاله أهي صورة جامدة تديها لشركات الدخان عشان يحطوها على العلب لو عايزين الناس متشتريش.
  • واحد بيقول لمراته أنا نفسي أسمع منك كلمة حلوة.. راحت قالتله حلاوة، قام قالها طب بلاش.. عايز أسمع كلمة تهزني كده، راحت قالتله ممكن مرجيحة؟
  • محشش بيسأل صاحبه بيقول له أنا عايز أعرف هو لو الدجاجة خانت الديك اللي هي متجوزاه مع ديك غيره.. يبقى البيض اللي هيجبوه حلال ولا حرام أننا نأكله.
  • واحد قال لصاحبه هقولك فزورة حلوة.. عارف ليه الراحة بتاعت الصعايدة 10 دقايق بس في الشغل؟ قاله لا ليه؟ قاله عشان أغبياء لو الوقت زاد عن كده هينسوا وهيضطروا يتعلموا من الأول.

أرخم نكت مصرية

معروف عن الشعب المصري أنه يتميز بخفة الدم واللطافة.. لذا نجد أن سكان العالم أجمع يبحثون عن النكت المصرية بكل أنواعها، لذا سنعرض لكم أجمد نكت رخمة عبر بعض النقاط الموضحة في السطور التالية:

  • واحد محشش سأل صاحبه عارف ليه الخباز لما ييجي يشتغل بيخلع الساعة بتاعته؟ قاله ليه.. قاله عشان الدقيق اللي هيشتغل بيه مايعاكسش الدقيقة اللي في الساعة.
  • صعيدي كان تعبان بصوا لاقوه بياخد الأدوية بتاعته في مواعيد مختلفة.. ولما سألوه ليه كده؟ قالهم عشان الجراثيم ماتبقاش عارفة الميعاد وتتفاجئ.
  • واحد صعيدي وواحد أمريكي وواحد إسباني اتفقوا أن هما التلاتة يتنافسوا مين يجيب أكبر تمساح؟ راح الإسباني جاب تمساح كبير، وراح الأمريكي جاب واحد أكبر منه، بس الصعيدي مجاش.. راحوا يدوروا عليه لقوه ماسك تمساح لسه صغير وعمال يغنيله بابا فين.
  • شخص صعيدي بيسوق العربية وعمال يعمل بيها خمسات.. فالناس قالتله في أيه يا عم ما تسوق عدل، قالهم يا جماعة عايز اشوف رقم اللوحة الله.
  • واحد بيقول لصاحبه تعرف ليه النملة بتركب على ضهر الخنفسة؟ قاله لا ليه.. قاله عشان تحس أنها بتدلع.
  • واحد من الصعيد بيتكلم مع صاحبه فالتاني بيقول له بس أنا كده عداني العيب.. قاله يا عم ولا يهمك خد اللي بعده.
  • صعيدي دخل الجيش بص للي معاه وقاله أنت من ديشنا؟ قاله لا، قاله يبقى أنت من جيش العدو.. وراح طخه بالنار.
  • مدرسة رياضة اتجوزت مدرس رياضة لما خلفوا جابوا عيل متساوي الساقين.
  • محشش بيحكي لصاحبه بيقول له أنا روحت الجهادية وطلعت من الجهة التانية.
  • مسطول ماسك عود كبريت ومصمم يولعه.. فجه صاحبه قاله يا عم خلاص غيره يمكن بايظ، قاله لا إزاي دا لسه مولع من شوية.

نكت صعيدي رخمة موت

الصعايدة المصريين من أكثر الأشخاص المعروفين بالنكت.. لكن مع الأسف أكثر نكاتهم نكت رخمة، لكن كالعادة لكل شيء المحبين له، لذا إذا كنت من الأشخاص الذين يحبون قراءة نكت رخمة صعيدي يمكنك متابعة ما يلي:

  • واحد صعيدي خلص دراسته وعمل دكتوراه.. فجه قال لمراته أنا مش عارف الناس كلها بتقول أن الصعايدة أغبيا ليه، فقالتله يا سيدي فكك منهم دق على الخشب بس لحسن تتحسد، قام دق على الخشب فردت قالتله مين على الباب؟ قالها استني ادخلي أنتِ جوا أنا اللي هفتح.
  • فرخة دخلت تستحمى بشامبو هيد اند شولدر فقست بيضة ملهاش قشرة.
  • راجل صعيدي فتح محل كبير يبيع فيه الأنابيب بتاعت الغاز، قام جه في أول يوم فجر أنبوبتين في نص البلد عشان يعمل دعاية لنفسه.
  • شخص أحول لما أمه ماتت راح دافن أبوه.
  • محشش بيسأل صاحبه هو أيه الفرق بين موس الحلاقة والأسبوع والصحراء؟ قاله معرفش.. قاله سهلة موس الحلاقة فيه حدين والأسبوع فيه حد واحد.. لكن الصحراء مفيهاش ولا حد.
  • مرة قط فضل يجري ورا قطة في الشارع لغاية ما جت عربية وخبطتها.. راح وقف بص عليها وقالها يلا تستاهلي ابقي خلي الشرف ينفعك.
  • واحد مسطول قعد يحكي لصحابه أنه أكل رز معمر وفرقع في وشه.
  • صعيدي راح قال لأبوه أنا هاخد نوكيا.. راح أبوه قاله والله ما يحصل مش هتاخد حد غير بنت عمتك.
  • واحد من الصعيد حب يبان أنه جامد قدام أهل البلد راح شايل الجرس بتاع الباب وراميه وجاب مكانه جهاز فايبريشن.
  • مدرس كيميا من كتر حبه للمجال سمى أول ولد ليه سامي أكسيد الكربون.
  • محشش قعد يحكي للناس عن أوفى حيوان في العالم.. فقالوله مين هو أوفى حيوان بالنسبالك؟ قالهم النملة اللي متجوزة فيل، عشان هتقعد تدفن فيه العمر كله.

أجمد نكت رخمة

نكت رخمة

يستمتع الكثير من الناس بسماع نكت رخمة.. حيث يرون أنها تكون مضحكة أكثر من النكت الطبيعية، لذلك سنعرض لكم مجموعة من أفضل نكت رخمة.. بحيث تكون مختارة لتناسب كافة الأذواق، وذلك من خلال ما يلي:

  • واحد بيشتغل في محل قصب.. وقع وقصبة رجله اتكسرت قام اخدها ومصها.
  • صعيدي حس أن دماغه عمالة تلف راح قام يقابلها في الشارع اللي ورا.
  • اتنين صعايدة صحاب قاعدين بيشربوا الشاي سوا في البلكونة.. واحد منهم بيقول للتاني واحد نط من الدور الـ 3 تفتكر لقى ايه؟

راح قاله مش عارف.. قاله لقى مصرعه، طب واحد نط من الدور الـ 4 تفتكر لقى ايه؟ قاله مش عارف برضه.. قام قاله لقى حتفه، طب واحد نط من الدور الـ 5 ممكن يكون لقى ايه؟ قاله ها لقى أيه دا كمان؟

قاله لقى اللي وقعوا قبله، قام الشخص التاني سابه ونط هو من البلكونة.

  • مرة كان في كتكوت ماشي بيشرب سجاير في الشارع.. شافه ديك كبير وقاله يابني ليه كده؟ مش خايف من أهلك.. راح قاله لا أنا كتكوت مصانع مليش أهل.
  • واحد بيلعب كرة حلوة أوي.. لما شاط طلع ريحة.
  • صعيدي قال لأبنه اللي مسافر اسكندرية أوعى يابني تروح محطة الرمل.. قاله ليه يا أبوي؟ قاله لحسن تغرز هناك.
  • واحد صعيدي كان ماشي مع بنت من الشارع.. مرة واحدة قالتله اجري بسرعة ابويا جاي، راح قالها وفيها أيه قوليله اني اخوكي يعني.
  • واحدة اسمها تفيدة بتشتغل في البيوت.. صاحبة البيت قالتلها نضفتي التلاجة يا تفيدة؟ قالتلها أيوة طبعًا، كل اللي فيها كان طعمه حلو أوى.

نكت رخمة بس مضحكة

إذا كنت تريد الحصول على أقوى نكت رخمة يرددها المصريون فيما بينهم، فعليك أن تتابع ما سيعرض في الفقرات التالية، حيث سنختار لكم نخبة رائعة من أفضل نكت رخمة:

  • مرة واحد راح عند أثنين ورجعوا ثلاثة.
  • مرة مدرس لغة عربية شاف مراته من بعيد فضل يصرخ: واااو الجماعة.
  • مدرس رياضة عمل حادثة وعربية خبطته الدكاترة قالوا له: يوجد كسور كثيرة في جسمك فرد عليهم قالهم: طب وحدوا المقام.
  • مرة ولد راح يزور جدته ف بتقوله مين على الباب؟ قالها: افتحي أنا حفيدك، ردت قالتله هتفيدنى بايه.
  • مرة اتنين مدرسين رياضيات اتجوزوا وماتوا.. لما جم يتدفنوا اتدفنوا في جبر واحد.
  • مرة واحد صام لغاية المغرب والتاني صام لحد تونس.
  • مرة واحد كتب على الحيطة ومقدرش يطلقها.
  • واحد راح دولة فيتنام بس ملقاش ناس عشان الناس هناك بتنام بدري.
  • محشش مرة جاب شعره على جنب، ولما سألوه ليه قالهم عشان عايزه في موضوع سر.
  • بنت اسمها ساندي جابت مجموع كلية هندسة ودخلتها فبقى اسمها ساندي متر.
  • طالب راح اشترى قلمين.. فالراجل سأله ليه اتنين؟ قالهم واحد اكتب بيه والتاني سيه.
  • محشش سأل صاحبه تعرف الطماطم لما بتعطس بتقول ايه؟ قاله لا بتقول ايه.. قاله كاااتشب.
  • واحد غبي كان بيسأل على الساعة، فالراجل قاله الساعة دلوقتي 10:10 راح بصله وقاله يا عم وليه التعب ده ما تقول انها 20 على طول.
  • واحدة حبت تتجوز من ورا أمها.. قامت أمها لفت وشافتها.
  • مرة واحد كان أقرع دخل الحمام اتزحلق من المياه اللي على الأرض.. اتخبط في رأسه قام اتزحلق تاني.
  • محشش حكى لصحابه أن مرة كان في مدير عام ومدير تاني غرق.
  • محشش صمم أنه يركب دماغه قام عمل بيها حادثة.

نكت رخمة جدا طويلة

بعد أن تعرفت على أقوى نكت رخمة في مصر، عليك أن تتعرف على النكت الطويلة البايخة.. حيث إن هذه النكت تختلف تمامًا عن نكت رخمة الأخرى، ويمكنك رؤية ذلك من خلال ما يلي:

  • واحد مسطول مكنش عارف اليوم النهاردة يوم ايه.. فسأل صاحبه قاله هو النهاردة يوم الأحد ولا السبت.. فالتاني رد عليه قاله الاتنين.. قاله أيه دا مع بعض.
  • محشش شاف طيارة هيليكوبتر وحب أنه يطور فيها شوية حاجات.. قام شال منها المروحة اللي فوق وحط بدلها تكييف.
  • واحد صعيدي جاب مراية في البيت.. فمراته راحت وقفت قدامها وطلعت قعدت تعيط وتقول جوزي اتجوز عليا، وراحت اشتكته للعمدة بتاع البلد.. جه العمدة يشوف أيه اللي حصل فوقف قدام المراية، قام قالها لا دا كمان جاب عمدة جديد للبلد.
  • سلحفاة هبلة دخلت مطعم وقعدت تدلع فيه.. قام جه الجرسون وطردها برا، فرجعتله بعد أسبوع تقوله يا عم على مهلك متزقش.
  • مجموعة من الشباب قاعدين يسكروا سوا ودماغهم طايرة.. دخل شيخ كبير عليهم وقالهم أيه اللي بتعلموه ده حرام عليكم، راحوا ردوا عليه قالوله وعليكم الحرام.
  • راجل غبي الناس لقته بيطلع كل يوم يقف مع دودة تحت الشمس وبعدها يدخل البيت، فقالوله انت بتعمل ايه؟ قالهم الدكتور قالي أقف تحت الشمس دقايق مع دودة.
  • واحدة هبلة اتخطبت لراجل متعرفهوش.. راحوا يشربوا عصير سوا، فسألها اجيبلك شاليموه؟ قالتله لا ملهاش لازمة خليها بعد العصير.
  • مسطول راح يقعد على قهوة قام قالهم ولا أقولكم خليها شاي أرخص.
  • اتنين هبل محششين كانوا عايزين يروحوا مشوار، فواحد منهم قال للتاني تعالى نركب اتوبيس.. قام صاحبه قاله لا احنا نجري وراه اسهل ونوفر على نفسنا أننا ندفع الـ 2 جنيه، راح التاني قاله لا طب ما نجري ورا تاكسي ونوفر 20 جنيه.

أبوخ نكت في مصر

ضمن التعرف على نكت رخمة، يجب أن تكون على علم أن لفظ نكت رخمة لا يطلق سوى على النكت التي لا تجعل الشخص يضحك من القلب.. وفي حالة كنت من الأشخاص الذين يحبون هذا النوع من النكت.. يمكنك أن تجد أجمد نكت رخمة عبر السطور التالية:

  • محشش ماشي في الشارع بيتطوح.. فخبط في واحد تاني قام الراجل قاله أيه يا عم ما تحاسب، راح قاله والله ما معايا فكة يا حج.
  • اتنين محششين ماشيين سوا.. شافوا بيتزا وبيبسي وبطاطس عمالين يجروا في الشارع، فواحد منهم سأل التاني هما بيجروا كده ليه؟ قاله مش عارف يمكن عشان وجبات سريعة.
  • صعيدي سافر يشتغل في الهند.. أول يوم قابل بنات كتير عندهم نقطة حمرا في راسهم.. قام وقف قدام واحدة فيهم وقعد يضحك عشان كان فاكرها بتصوره فيديو.
  • بنت مش بتسمع الكلام خالص في المدرسة وكل المدرسين بيشتكوا منها.. نزلت مرة للمديرة، فالمديرة سألتها عملتي أيه المرة دى؟ قالتلها رميت وردة من الشباك، فالمديرة استغربت ليه نزلوها عشان رمت وردة.

بعدها بحبة لقت بنت داخلة عليها متكسرة بتقولها أيه اللي عمل فيكي كده يا حبيبتي؟ قالتلها أنا وردة اللي فلانة رمتنى من الشباك.

  • واحد غبي راح يعمل تحاليل عشان عيان.. فبعد ما خلص قال للدكتور ها يا دكتور عندي ايه؟ قاله سكر، قاله ربنا يخليك يا دكتور دا من ذوق حضرتك.
  • محشش بيقول لصاحبه أنت عارف إني منشف ريق البنات؟ قاله اشمعنا؟ قاله كل ما اتعرف على واحدة تتف عليا.

الصعايدة من أكثر الناس المعروفة بما يسمى نكت رخمة.. حيث إن أغلب نكاتهم تكون غير شيقة، لكن على العكس.. هناك جمهور حافل يحب الاستماع إلى نكت رخمة مضحكة جداً.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *